Jennylyn - Patrick, sandali lang ang tampuhanAlan Diones
Abante Tonite
09/22/07
Tinawanan lang ni Jennylyn Mercado ang isyung break na sila ng nobyo niyang si Patrick Garcia.
"Hindi po kami nagbi-break. Hindi ko nga po alam kung saan nanggaling ‘yun, eh! Malabo pong mangyari ‘yon! Ha! Ha! Ha! Hindi po talaga," bulalas ni Jen nang makausap namin siya kamakalawa sa presscon ng indie film na Nars, na ngayong araw na ito ang first shooting day sa direksyon ni Adolf Alix, Jr.
Pero inamin sa amin ni Jen na nagkatampuhan sila ni Patrick. Feeling niya ay normal lang na magtampo ang boyfriend niya dahil nu’ng mag-guest sila kamakailan sa SiS, birthday pa mandin ni Patrick pero ang ipinalalabas sa monitor sa studio ay ‘yung teaser ng guesting nila ni Mark Herras sa Magpakailanman kung saan may halikan silang dalawa.
Tuloy, sa nasabing episode ng SiS ay halatang wala sa mood si Patrick at parang ayaw nitong halikan ang nobya nang kantiyawan silang mag-kiss.
Gaano katagal ang tampuhan nila?
"Sandali lang po, sandali lang," ani Jen.
How true na nagalit daw si Patrick sa halikan nila ni Mark sa Magpakailanman at binilang pa raw nito ang kanilang kissing scenes?
"Hindi ko po alam, eh! Binilang niya ba?" patanong na sagot sa amin ng dalaga.
Bakit tila naaapektuhan si Patrick sa pagtatambal nila ni Mark? Dati ay hindi naman, di ba?
"Hindi ko po alam… siguro, ganu’n lang po talaga," dayalog ni Jen, na halatang hindi sure kung anong isasagot sa tanong namin.
Nu’ng birthday ni Patrick ay dinalaw niya raw ito sa taping ng Fantasticman dahil naawa siya na birthday na birthday nito ay nagtatrabaho ang binata.
Kaya lang ay nakaligtaan niya raw bilhan ng birthday gift ang kanyang nobyo. Hirit namin, kaya naman pala nagtampo sa kanya ang syota niya, eh!
"Ha! Ha! Ha! Hindi po, lahat naman ng occasions, may gift ako sa kanya, eh! Anniversary, monthsary, lahat! Nakalimutan ko lang talaga siyang bigyan ng birthday gift, kasi naging busy po ako sa work, eh!" katwiran ni Jen.
One year and one month na ang relasyon nila ni Patrick at happy daw sila sa isa’t isa. Nagkakagalit sila pero hindi kagaya ng matitinding away nila noon ni Mark nu’ng magsyota pa sila.
"Opo, tampuhan lang ‘yung sa amin ni Pat, hindi naman ‘yung nag-aaway na talagang away," nakangiting pakli ni Jen.
***
Hindi pa sigurado ni Jennylyn kung totoong gagawin nila ni Mark ang sinenobelang My Only Love.
Narinig niya lang daw ito mula kay Direk Louie Ignacio (na nakatakdang magdirek ng nasabing sinenobela) pero saka na raw sasabihin ni Jen na sure na ito ‘pag nag-roll na ang kamera.
"Mahirap na pong magsalita, baka mamaya, sabihan ako ng, ‘Hindi sa ‘yo ‘yun!’ Ha! Ha! Ha!" tawa niya.
Okey ba sa kanyang si Mark ang makakatambal niya sa halip na si Patrick?
"Pagdating po sa work, okey lang sa akin kahit na sino. Okey lang po kung si Mark."
Kung siya ay ipinapareha ulit sa ex-BF niyang si Mark, may balitang si Patrick naman ay ipapareha sa ex-GF nitong si Bianca King. Anong reaksyon niya rito?
"Okey lang po, kasi trabaho naman ‘yun, eh!" matipid niyang sagot.
Ayon kay Jennylyn, co-managed pa rin siya ng GMA at ng manager niyang si Becky Aguila, pero tila lumalabas na ‘agent’ na lang ni Jen si Becky dahil direkta na raw na nakikipag-usap sa kanya ang GMA.
Hindi alam ni Jen kung totoong sa kanya ibibigay ng Siyete ang Angela Markado (may balita kasing kay Katrina Halili na raw ito) at tila clueless din siya nang sabihin naming balak siyang isama ng GMA sa Joaquin Burdado bilang kapareha ni Robin Padilla.
"Sana, sana po! Siyempre, sino ba namang aayaw di ba? Ayoko namang umayaw sa trabaho."
Paano kung ligawan siya ni Robin?
"Ay, hindi naman siguro! Ha! Ha! Ha!
"Hindi ko po alam talaga. Siyempre po, may boyfriend naman ako, di ba?" natatawang sey ni Jen, na gumaganap bilang mahirap na nursing student na si Ela sa Nars.